كتاب شمس المعارف النسخة الاصلية pdf

ناس كتير سألت عن كتب ملعونة في الشعوذة والسحر الاسود، زي شمس المعارف لابن البوني وعلم الطلسمات وخلافه، واللي حكي عن نسخة ملبوسة قتلت جارهم لما قراها ونسخة محروقة مش عارف ايه وPDF وبتاع، طب النسخ الاصلية للحاجات اللي تخوف دي فين؟ الreference الاول اللي مكتوب بخط ايد المشعوذين دول اتحرقوا؟ اختفوا؟ اتلعنوا؟ في العراق؟ في ايران؟ في مكتبة الفاتيكان؟


 طب بما اننا في الصيف يعني، فا الاسكندرية اكبر من مجرد محافظة ساحلية عالبحر المتوسط تروح تنزل البحر فيها بالفانلة الحمالات ولا تاكل ايس كريم من عزّة ولا تعاكس بنات علي كوبري ستانلي ولا تفطر في البان سويسرا ولا تتعشى في الفلاح، الاسكندرية اعمق من شارع خالد بن الوليد و قهوة البورصة التجارية وهريسة احمد حسانين، الموضوع اكبر من كدة.


 لو مزرتش مكتبة الاسكندرية قبل كدة وبتسمع عنها زي اي حد ما بيسمع عنها وهوا بيتمشى عالبحر العصرية كدة، فا احب اقولك بأختصار ان مكتبة الاسكندرية دي مشروع ضخم تم بالتعاون مع الأمم المتحدة سنة ٢٠٠١م، وكانت اعادة احياء لمكتبة الاسكندرية القديمة اللي كانت ايام البطالمة واللي انشأها بطليموس الاول بتخطيط من الاسكندر الاكبر اللي مات قبل ما تتبني وكان اسمها "ببلتيكا دي لي اكسندرينا".

 واللي كانت بتضم آلاف المخطوطات من كل حتة وكل علم جابهم مستشار بطليموس "ديمتريوس الفاليري" سنة ٣٣٠ ق. م، وكانت عروسة زمنها ومفيش زيها في العالم وكانت بتضم مخطوطات فرعونية واغريقية، وده كان حدث يعني كون المخطوطات دي كانت خاصة بالكهنة بس قبلها واتعرضت في المكتبة، لكن للاسف اتحرقت اكتر من مرة لحد ما اتهدت خالص سنة ٤٨ ق. م، لما يوليوس قيصر حرق ١٠١ سفينة عالشط تابعين لبطليموس الصغير، والنار جابت المكتبة ارض ارض ودي الرواية الاشهر مش الاكيدة، وفيه بردية في المكتبة الجديدة دلوقتي عليها وصف المكتبة القديمة.

 المهم، اليونسكو بالتعاون مع مصر، بنوا المكتبة الجديدة اللي عالبحر قرب الشاطبي واللي كلنا عارفينها دي، بس المكتبة دي مش مجرد مكتبة حكومية مليانة كتب لو ده اللي جه في خيالك، الموضوع اعمق من كدة بكتير،

 بعيدا عن الصفقة الفرنسية اللي وردت للمكتبة نص مليون كتاب في كل المجالات، وبعيدا عن ملايين الكتب اللي جوا المكتبة، والارشفة الرقمية وكل البلاوي دي، الا ان فيه جزء كبير من المكتبة دي يهمك اكتر من مجرد كونها مكتبة، الا وهو جزء المتاحف، في قلب مكتبة الاسكندرية فيه اكتر من متحف،


منها مثلا متحف السادات اللي هتلاقوا فيه مقتنيات السادات زي جايزة نوبل والبايب والقلم اللي كتب بيه المعاهدة وكدة، والاهم من كل ده بدلته اللي اتقتل بيها واللي فيها دمه لسة لحد دلوقتي موجودة في المتحف،

 ومتحف تاني للآثار هتلاقي فيه آثار فرعونية ورومانية وتوابيت واثار جزيرة نيلسون اللي كانت مقبرة رومانية قديمة، حاجات مش هتلاقيها غير جوا المتحف ده بالذات، وفيه اكتر من متحف تاني، الا انك هتسيب كل ده وهتروح للكنز بقا،

متحف جوا المكتبة اسمه "متحف المخطوطات". ايه متحف المخطوطات ده؟ بص يا سيدي، كان فيه مكتبة تانية في الاسكندرية اسمها مكتبة بلدية الاسكندرية، اتأسست سنة ١٨٩٢م وكان فيها بتاع ٦٠٠٠ مخطوطة لامهات الكتب وبرديات وبتاع، لكن للاسف المكتبة اتضربت قنبلة ايام غارات الحرب العالمية التانية ١٩٤٠م واتهدت، وعلي الرغم انها اتصلحت واتفتحت تاني الا ان المبني نفسه في محرم بك كان قدم وتصدع،


وده لحد ما مكتبة الاسكندرية اتفتحت في ٢٠٠٢م فا المخطوطات دي اتنقلت للمكتبة. ب١٥ جنية "معرفش السعر كام دلوقتي" هتخش المكتبة، هتفضل ماشي لحد ما توصل لمتحف المخطوطات ده، هتلاقي ٣ مسارات، مسار منهم فرعوني فيه كتاب الموتى وبرديات وبتاع، ومسار منهم يهودي ومسيحي هتلاقي لفائف للتوراة واقدم نسخ الانجيل المكتوبة بخط الايد اللي جايين من سانت كاترين، هتسيبهم وتخش عالمسار التالت، العربي الاسلامي، بعيدا عن رسائل النبي الاصلية للملوك اللي هناك، وبعيدا عن كسوة الكعبة الاصلية،

وبعيدا عن نسخة بانكوك الاصلية من كتاب وصف مصر بتاع الحملة الفرنسية نفسها، ولا عجائب الامصار النسخة الاصلية بردو، هتطوّل شوية لحد ما توصل لركن فاترينات العلوم الخفية، اللي موجود في الحتة دي بقا خلاصة الخلاصة، النسخ الاصلية لكتب السحر وتسخير الجن اللي اتكلمنا عنها فوق، اشهرهم واللي هتلاقيهم هناك في الفاترينات،


كتاب علم الطلسمات الاشهر لتسخير الجن، معروض هناك عادي والله اللي مفيش ساحر مستخدمش نسخة منه عشان يسخر جن، في كمان كتاب لعنة الإشراق فى معرفة صنعة الاوفاق ولو متعرفوش اعمل سيرش عنه عشان متكلمش كتير، وفيه بقا الكتاب الاشهر اللي كل الناس كانت بتدور عليه مش لاقية منه نسخة حقيقية، ابو الاساطير كلها اللي قالك معرفش مين قراه فا اتحرق والقصص دي، كتاب "شمس المعارف ولطايف العوارف" الاصلي بتاع ابن البوني اللي بتخاف منه ده، موجود ومفتوح هناك في الفاترينة، منبهرتش؟ طب خد المفاجأة بقا،


اشهر كتب التنبؤ بالمستقبل واللي منسوب للامام علي بن ابي طالب، الكتاب الغامض اللي مفيش حد ميعرفوش، اللي لحد دلوقتي منعرفش مين كتبه وبيتنسب للامام علي شوية وللامام جعفر الصادق شوية، اللي بيتنبأ بمستقبل الامة الاسلامية لحد النهاردة "مع تحفظي الشخصي عن كوني مصدق ولا لا" كتاب الجفر الجامع بتاع الشيعة ده، نسخة اصلية بردو هتلاقيه هناك معروض ومفتوح للجميع. القصة مش في انهم موجودين في فاترينات ومفتوحين للعرض عشان تبص عليهم وتقول واو،

القصة في انك وانتا هناك تقدر تقرا الكتب والمخطوطات الاصلية دي عن طريق النسخة الرقمية عالكمبيوتر اللي متاخدين Scan، تقلب براحتك في الكتاب كله وتقرا اللي عايز تقراه وتعمل زوم زي منتا عايز، وبنفسك بقا تحكم بدل ما حد يسوحك، ودول مجرد امثلة بس، اللي جوا كتير اوي، وفيه خرايط قديمة ووثائق وبلاوي، بس حبيت اتكلم عن الكام كتاب النادرين دول بس.

 ايوة مصر فيها النوادر دي اللي كنا بنحفي عليها ونتخيلها قبل ما ننام، وموجودة جمب البيت اهيه فركة كعب من اي حتة في الاسكندرية، لو مهتم بكل اللي اتقال فوق ده فهي مفتوحة للزوار، تقدر تخشها وتشوف التحف دي بنفسك وتقراها من ايد اصحابها، لا تجيب نسخة مضروبة بقا ولا PDF ولا سور الازبكية الجميل. بصوا الصور من جوا المتحف والمكتبة، وشكرا ( محمد امير ).

تعليقات